|
زهيريات!
السلام عليكم ورحمة الله وبركاته
الزهيريات من الفنون الراقية الجميلة التي انتشرت في الكويت في السابق.. وانا من محبي الاستماع لها. لذا اتمنى من كل واحد عنده زهيرية أو معلومات عن تاريخ الزهيريات وأصحابها يضيفها هني. ومشكورين. |
أخي الكريم المفتاح،
لو بحثت في هذا القسم لوجدت العديد من الزهيريات لشعراء الكويت. |
انا قلت لو نجمعها هني, توفر علينا عمليات البحث.
|
الزهيريات طبعا فن بدأ وانتشر في جنوب العراق، مثل البصرة والزبير، ولأنه فن جميل انتقل الى الجنوب كالكويت والبحرين وقطر، من الزهيريات الكويتية نذكر:
زهيرية لفهد بورسلي ويقول فيها: يـا سيــد البيـض ياللـي بينـهم وردا حالي مثـل حال قيـس العامـري وأردي باسباب عـذرك طريـح الموسـده وردا خل المساييـر في جنـح الدجـى خاطـر وادرك محبك ترى هجرك كسـر خاطـر ما كـل يـوم يجيكـم يا تـرف خاطـر البيـر طمـه عـن الـوارد يقـل وردا زهيرية لعيسى القطامي يقول عالجت نفسـي على العـادات ما طاعـت أمـرار هـددتـها بالحبـس ما طاعـت سـايلتـها بـالـرضـا والله ما طاعـت النفــس هـذي بمـا عـودتـها تعتـاد أطمــع لهـا بالفضيلـة علّـها تعتـاد وإحذر تخدعك على الخسه تـرى تعتـاد أوصيك تصعـد بهـا للعـز إن طاعـت زهيرية لفهد الخشرم قال فيها: يا زين جـد لي بوصـلك لا تقـل لـي لا أدعيـت الايـام من طبـع السـرور بـلا هل كيـف ترضـى لغيـري ولجنابـي لا أقسمـت بالله روحـي والـوجـد عنـدك وجوارحي ما أنبـرت من دائهـا عنـدك إن كان الانذال مثل أهل العـرف عنـدك كـل بعقلـه رضــي إلا بمـالــه لا زهيرية لحسين بورقـبـه يقول: اهلا هـلا بيك يا غايـة لـذيذ امنـاي يا هادم طـود صبري و انت بس امناي محبتك في ضمـير احشاي و انت امناي لا رخص لك الرّوح و افعل ما تريد ابها و انظـر لحالي بسـور اجفاك و انتبها منّـك اناريد نظره اسـتـعيـش بـها مالي على اسباب وقتي قصّرت يمنـاي زهيرية لفهد بورسلي يقول: يا صـاح عد الرفاقـا بالحكـي عدهـم وتعرف ربع الرخـا مالك قـدر عدهـم ربـع الفراغـات عنـد النايبـه عدهـم الطيـب محفـوظ عنـد رفاقتـه وهلـه ترجى اهل كيف حـالك مرحبـا وهلـه خالف هواهـم وقلبـك بالصبـر وهلـه لو كنت ظميـان لا قـادر على عدهـم زهيرية لفهد بورسلي يقول: أهيـم بهمـوم دهـري سـاعـةٍ وانتبـه هيهات تسلـم من همـوم الدهـر وانتبـه لو كـان شمسـان تشبـه ونتـي وانتبـه تحطـم الطلـع ركـن من ركـن وانفـك الهـم غصب على عينـك يجـي وانفـك مثـل الفيـاتـر بهالدنيـا نشـد وانفـك كل من الضيـم مفراصـه فـرط وانتبـه زهيرية لفهد بورسلي يقول: يا عيـد الافـراح ونّسـهم وانا هـمّ لـي وعيـون الاضـداد مستـره وانا همّلـي مليان قلبـي مصايـب والحشـا همّلـي أنا وقلبـي علـى نـار الغضـا نصلـه متقاسمين الحزن نص لي وهو نص لـه منين ما صابتـه نصلـه علـى نصلـه ضرب السهم بيننا هـم له وانا هـمّ لـي زهيرية لفهد بورسلي يقول: يا ناعـس الطـرف خـل مواصلك منـا واعرف حالات الهـوى وصـل بلا منـا لا تقـول منـا وانا قـول الـدرب منـا أخاف حسـودي يفـرق شملـنا وهلـك تشمت بنا الناس خلق الله وهلـي وهلـك مـا دام وهلتنـي واجـب انـا وهلـك ليما يدور الفلـك نقضـي الوطـر منـا زهيرية لحمد العسعوسي ويقول: أراك يا قلـب عـن درب الرشـاد وعـار وتغيـث من تاه في بحـر السفـاه وعـار عليك صـارن سهـلات الـدروب وعـار إن مـاز كفـك خـلا بيـن المـلا اسلـك في كربة طحـت ما لـك من تنفـس لـك اوصيـك فيـما يسـد لحـالتـك اسلـك إلا الـذي فيـه منقــود عليـك وعـار زهيرية عبدالله الفضالة قال: فـزنا بالالقـاب وافجعنـي غـزال غـاب عن ناظري غاب تغيـاب القمـر لي غـاب رغبت بالغـاب وادعن بالعيـون ارغـاب محزون يا صاح من طفل لصوبـي صـاح عزي لمن صاح من عظم الهوى يا صـاح ادعاني الصـاح بارض خاليـه صحصـاح ياليـت هالغـاب من حبه رجـع ما غـاب زهيرية لمحمد الفوزان يقول فيها: يا صاح ماني على جور الدهـر صاحبـك أغار لي شفت غيري بهالوقـت صاحبـك العـافيـه دوم ثـوبـك والهـنا صاحبـك ساعات عندي تمـر وحشاشتـي يا مـرد كلا ولا شـوف غيـرك بالخلايـق مـرد عنـدي تحقـق لانـك من كريـم ومـرد لا شك يا حيف ما تعرف قـدر صاحبـك زهيرية لفهد الخشرم يقول: يازين عقب التغلي لاح لي حاجبك وبعشرتك دوم سلطانك تحت حاجبك لولا الكبر لا قول ياسعد عين الدي حجبك حبك براني وانشب ضامري ابلواي تسعي بتلافي تنشد عن سبب بلواي مو انته سبب هيمتي وانته سبب بلواي بلواي منك ومن عينك ومن حاجبك زهيرية لعبدالله الفرج قال فيها: ما لـوم انـا الدهـر لو جـرد سكاكينـه والهــم بهــواك مـا ونـت سكاكينـه محمل غرامي شلـه وانحطـت سكاكينـه وبقيـت محتـار محـدٍ نظـر بي وعـظ والنصـح ما جـاب قلـب المتيـم وعـظ اصبحت ملجوم واصفـق بكفـي واعـض مثل الجمـل لو طـاح كثـرت سكاكينـه زهيرية لعيسى القطامي قال فيها: كبر العمايـم تصدعنـي بغيـر إصـلاح شطـار في لفـها لكـن بغيـر إصـلاح في طيها الجـهل مع سـاس الغبـاوة لاح شـ الفايـدة هالكبـر لفـه بليـا ...نـفع لا منفعـه للوطـن ولا علـم بـه منتـفع ما همهم غير قرض العرض وتر وشـفع فليسقط اللاف وليحيى العظيـم إصـلاح زهيرية لأحمد الرشود: هم الدهر طاش يا أحمد بالضميـر وطنـا أنـوح مثـل الذي أقفـى وخـلا وطنـا بحوافـره كيـف آكـب يا نديـم وطنـا بينت الأوعاز من صرف الزمان وتبـت سلمى بسيف الجفا حبـل المـودة تبـت النـاس ما يعلمـون بـأي حـال تبـت أشكـو إلى الله من دهـر علينـا وطنـا زهيرية لحمود البدر يقول : ما اغفر انا اخطاك وحبك بالضمير انزاح من حيث جرح ٍ بقلبي ما برا وانزاح ونسيت ذاك الطرب واللعب وامزاح انكرتني ليش شافعلت انا من بد من بين الرفاقة ليه تحكي علي بد الضرس لي من رقل من شلعته لابد وانظر الى الغيم لي هب الشمال انزاح زهيرية لعبداللطيف السلطان قال فيها: الروح كالسايبة والعقل راعيها راعي بصيرة بعين الحق راعيها يا ظالم النفس بالانصاف راعيها لا تهين المدركة وتقول هذا قدر رابي بمعزة ولا لي عالمذلة قدر عندك دناعة نفس وتريد عز وقدر النفس الدنية اطيح قدر راعيها |
زهيرية لعبدالرحمن الضويحي
دهرك ولوزان لاتامن قلوبه لوزان يعطيك كل جلاه وقلوبه ولامن نكف تنعمي مايسفر قلوبه تمشي تحسس عالحيطان مالك عصى ويومن طلبت العصى اقرب قريبك عصى محدن يوديك لوإن بيتك بحذفت عصى ولك هذاالدهر شفت عدله ومقلوبه |
قواكم الله الفهد والفريس.. جميل جدا.
انا للاسف ما احفظ شي من الزهيريات بس اذا لقيت شي راح احطه لكم هني. ويعطيكم العافيه. وسامحوني عالتأخير ترى انشغلت شوي. |
من أشهر الزهيريات :
1 ـ الزهيرية التي ذكرها الأخ الفهد في مشاركته والتى فيها " الضرس لامن رقل .... الخ " وكنت أظنها لعبدالله الفرج فيرجى التأكد 2 ـ زهيرية قالها أحد النهامة وهم راجعين من السفر مع حسين بن على وقد بلغهم وفاة زوجته الجازي حاملا ًفلم يخبروه . قال النهام معزيا له بطريق التورية ففهم حسين بن على المقصود فخنقته العبرة فوضع غترته على وجهه . وأحفظ منها الشطر الاول والأخير الشطر الاول : لي خـلـّة ٍ طعـْمهم مثل الشـَّهـَـد باللــــه والشطر الأخير : راح الخلَـف ولـْخلـّفوا قلنا الخـَلـَـف باللــــــه 3 ـ زهيرية بدأها أحدهم عند مرض موته فأكملها أحد المنانعة الكويتيين وكان حاضرا عنده ( لا أذكر الأسماء) قال : سلمى بلا انكار حطت في الحديد أوسام فرد عليه مكملا لها : شنهو كمالك خـَذ َتْ آدم ونوح وسام اصبر عليها قبل تسقيك مر ّ وسام ْ تيزَع من الموت وانته واحد ٍ مـُنكـَر تطوي حبـِلـْها وكل الناس في أوسام 4 ـ و زهيرية : راحت رجال الذي تحمي على الظاهرة أهل الوفا والصخا وافعالهم ظاهرة لي مركب ياحمد زرَّق على ظاهره متـْعادل ( فوق قصَّار ) والبيص منـَّه ظهر ( خطأ في الوزن من الرواة ) ...............................................؟؟ ون جيت أبرجيه خانت بي عروق الظهر ................................الخ............؟؟ ( هذا الذي أحفظه منها والذي عنده شرح وتعديل وإضافة يفيدنا )؟ = = = واللي عنده معلومة عن الجازي المكورة يفيدنا ؟ |
تبارك الرحمن كل الزهيريات المكتوبة حلوة
و بالأخص ازهيرية للشاعر فهد بورسلي (يا سيد البيض) اللي أعرفه بأنه في برنامج قديم تقدمه المذيعة المخضرمة منى طالب الدهام كل الاثنين على اذاعة دولة الكويت الساعة 11م تتناول فيه كل الزهيريات القديمة من شعراء كويتيين و خليجيين شكرا لكم |
اقتباس:
إهداء لك أخوي الكويتي .. نفس القصة الكاملة .. الرابط باللون الأحمر قصة النهام فرحان أبوهيلة مع النوخذة |
شكرا لك على الاهداء
ازهيرية جميلة دخلت الرابط و علقت على موضوعك جهود مبذولة يا مشرفنا الله يعطيك العافية |
| الساعة الآن 02:17 AM. |
Powered by vBulletin® Version 3.8.7, Copyright ©2000 - 2024
جميع الحقوق محفوظة لموقع تاريخ الكويت