[عبدالرحمن بك]

قصيدة: دار ونعمة الله (1)
شعر: الشيخ عبدالعزيز سعود الصباح

هلّت بشاير عيدنا بالعوايد
عيدالوطن يا مرحبا فيك يا عيد

ياعيدنا بالله على خير عايد
كلْ عام في عز ومحبه وتجديد

والعيد والله جمْعنا بالشدايد
ضمّ الصفوف وحطة الايد بالايد

والتفرقة مردودها للنكايد
حقْد النفوس وللمصافاة تبديد

نسمع ونقرأ كل يوم الجرايد
ونشوف بالتلفاز قتلي وتشريد

ناخذ دروس وهل ترى به فوايد
في مادَرَسْنا او تهايمْ وتنديد

في عالم ما بين مفلسْ وصايد
تطلعوا شوفوا على قربْ وبعيد

ما دام باقي للتصافي شرايد
نبغي الصفا لا نُوسع الامر تعقيد

اخوانْ لا يلعب بنا الشكّ وايد
من عائلة وحده سلايل اجاويد

ياما اثبتوا ما فكروا بالمكايد
إذا أوعدوا ما يخلفون المواعيد

برّ وبحر ماهمهم كل كايد
ولا يهابونه ارجالي صناديد

تعاونوا فرْد وجماعهَ وقايد
صيروا يد وحده لحفظ التقاليد

اذا اشتكى عضوي من الألم زايد
كل الجسم ينتابه الألم ويزيد

واحموا وطنكم ياكرام البدايد
في مثل ما كنتم إذا جاه تهديد

بيتي بلا أطناب ما هو بفايد
إن خانت أطنابه تطيح العواميد

تيقّظوا واجفوا وثير الوسايد
هل ما كفانا نومنا والتساهيد

إن ما تكاتفتوا غديتوا طرايد
إذا تفرقتوا خذوكم تفاريد

في هذه الدنيا فخاخ ومصايد
كلّي بفنّه يختل الصيد ويصيد

ويكون للمصيود جرم وضدايد
ويصير للصايد هتاف وزغاريد

ما يسلم اللي في بلاده محايد
ولا اتركوه الطامعين المجاحيد

مهما القوي يفعل بما كان رايد
الله هو اللي يفعل الشيء ويريد

حبلي يشدونه على كل بايد
اصبر وتبلى قوة الحبل ويبيد

نعرف ولا نجهل أموري وكايد
شيي، نعرفه ما نبي فيه تفنيد

بس عذرنا هو ما عرفناه سايد
ما بيدنا نقصْ وزياده وتحديد

عدوك اللي تعرفه له عوايد
تحتاط له ما يطلب الأمر تأكيد

أما الذي يضحك ويخفي حقايد
هذا البلا واللي اقوله تراديد

يارب يا هادي لك الأمر عايد
من غيرك اللي ينفع الناس ويفيد

يسّر لنا من جود فضلك زوايد
واجعل لنا مع أمرنا كل تأييد

يا ناس داروا نعمة الله بزايد
هذي وصاتي علقوها على الجيد

هلت بشاير عيدنا بالعوايد
عيدالوطن يا مرحبا فيك ياعيد

منشوره من جريده الوطن 28/1/2006