!! (All of those are Kuwaities))

[فحيحيلية أصيلة]

السلام عليكم .. شخباركم يا جماعة؟.. وش مسويين مع

رمضان؟>>يالله عسا ربي يرزقكم ختمتين بهالشهر الفضيل .

انا بقولكم سالفة يا سامعين السالفة ، و بآخرها عندي تساؤل

و اللي يعرف يجاوبني بالحجة المقنعة ياليت ما يبخل علي لان فعلا احترت !!

من مدة قريبة قبل رمضان كنت بالجامعة.. كان عندي موضوع

مع مدير الجامعة فكنت قاعدة بالانتظار لين يخلص و يطلع الي

كان قبلي عنده و بعدها ادخل .

ف كانت جمبي وحدة اجنبية ، بريطانية بالتحديد ، استاذة جديدة

و بتدرس عندنا قريبا في قسم الادب الانجليزي و اسألتني عن

قسم حبت تراجع فيه قبل دخولها على المدير ، ف رحت معاها

اوديها المكان الي تبيه ، و الشخص المسؤل اللي بيخلص شغلها

للحين ما جا .. ف قالت خلاص ارد اقعد بالانتظار ادخل على

المدير قبل واخلص موضوعي معاه تالي ارجع لهالقسم.. ف

رجعنا انا وياها>>و قعدت تشكرني سنة بساعة عشان وديتها

للقسم الي كانت تسال عنه >>كعادتهم.

و اثناء ما كنا قاعدين ننتظر المدير متى يفضى قعدت تدردش

معاي ، اذا كنت طالبة ولا استاذة ، و اش تخصصي و طبيعة

الدراسة و من هالحجي ، شافتني انا كنت لابسة بدلة محتشمة –

بطبيعة الحال بما اني متحجبة- و ملفع .

- لاحظوا يا جماعة انها اول مرة تجي الخليج ، واصلا اول مرة

تجي الشرق الاوسط بكبره برحلة عمل واقامة ، .. المهم.. طلعت

لي وريقة من بوكها مرسوم فيها –جذي يعني براس القلم- ثلاث

فئات من النساء>>اول رسمة لوحدة منقبة ومكتوب تحتها "

sunni ">> يعني سنية ، و الرسمة الثانية لوحدة بس متحجبة

–بدون نقاب يعني- و مكتوب تحتها "shiism" >>يعني شيعية

، و الرسمة الثالثة مرسوم وحدة بشعر وزينة –سفور يعني- و

كاتبة تحتها "liberal">> يعني ليبرالية ، - لا تشوفون شكلي

وانا مصعوقة و مذهولة ساعة اتمقل بهالوريقة- ، و سالتني

انا من أي الفئات ؟!!،

قلت لها ولا وحدة ،

قالت لي :ليش؟!! في بعد فئات اكثر من هذي؟!! ،

قلت لها ممكن اعدل لج هالمعلومة؟؟! ,, استأذنتها اعدل لها في

ورقتها –و مادري اشلون جتني هالفكرة- ،

ردت علي : أي ياليت >>على قولتها yes, please

شطبت على المسميات المتعددة اللي تحت الرسومات ، وكتبت

جملة وحدة :

All of those are Kuwaities , and

simply , the differentiation is just

associated with what they wear –

clothes- , no thing more!!)

يعني : كل هذول كويتيين ، والفرق ببساطة متعلق بس في ما

يرتدونه –الملابس- ، مو اكثر!!

و قلت لها هل كل النساء البريطانيات يلبسون تي شيرت اصفر

مثل ما انتي لابسة الحين؟

قالت لا طبعا

قلت لها ليش؟

قالت بديهي كل واحد يلبس الي يبيه

قلت لها that the signification -- هذا اهو المغزى – كل

واحد يلبس الي يبيه .

اخواني وخواتي.. التساؤل اللي ودي اطرحه واحب تشاركوني

فيه ، من المسؤل الي يخلي المجتمعات الاخرى تاخذ عنا فكرة ان

احنا منقسمين الى هذا الحد؟؟!! –هذي اللي عمرها ما شافت

الشرق الاوسط على قولتها واول شي تعرفه عن الكويت

هالمعلومة؟!!!

هل في صالحنا او يليق بوجهتنا الثقافية ان كل من هب و دب

صار يأسس جريدة او يفتح قناة و يقول اللي يبيه؟!!- عاد خذ و

خل من الالفاظ و الاساليب- >> كلنا ناس واعين والحمدالله >>

يعني نعرف بل نجزم ان الاعلام قادر ألف مرة ان يوصل الرسائل

و المعاني للكواكب الاخرى مو بس للمجتمعات الاخرى.

و الغريبة يا جماعة الخير ان حياتنا اليومية ، بسلوكنا

وتصرفاتنا عمرنا ما حسينا ان في فرق!!.. والله و بالله الكريم

طول عمرنا عايشين بيوتنا مفتوحة على بيوت اقصرانا اهم ادرى


يمكن اكثر من اهلنا عن مريضنا و صاحينا ، عمرهم ما قالوا بدو

ولا حضرنا ، ولا احنا بالمقابل قلنا شيعة ولا سنة ، >> منو

كثرنا عارف ان هذي حياة الكويتيين من خلقنا لليوم- وعسى لا

يغير علينا- ، رغم اختلاف الاعراق و المذاهب ، الا ان يجمعنا

"الدم الكويتي" – والا كاني غلطانة عدلولي!!-

اختم واقول.. عسى الله لا يغير علينا ولا يجعل أي ظالم يسعى ان

يفرق هالشعب بالفتنة له حكم او كلمة علينا،، و يحفظ ولاة

امرنا،، قولوا امين.


تقبلوا مني خالص احترامي وتقديري للجميع

اختكم.. فحيحيلية أصيلة .

[بنت اهلها]

اقتباس: الله لا يغير علينا ولا يجعل أي ظالم يسعى ان يفرق هالشعب بالفتنة له حكم او كلمة علينا،، و يحفظ ولاة امرنا،

اللهم آمين

مشكلة الاجانب يالغاليه ان ماعندهم ثقافه عن دول الخليج
والا هذي جايه بتشتغل وبتعيش كم سنه بالكويت ما كلفت عمرها تقرا لها كتاب عن البلد اللي رايحه له او تفتح النت وتاخذ معلومات ... معتمده على ورقه فيها رسم لشخص جاهل ... الله يكون بالعون
الله يعطيك العافيه يافحيحيليه

[فحيحيلية أصيلة]

هلا و غلا اختي بنت اهلها.. تشرفت يالغالية بمرورج وردج.. هذا المفترض انها وحدة متعلمة ، و يقولون الدكاترة الي معاها بالقسم ، انها تسال>> تخيلي تشوف الشباب الي لابس شماغ احمر ، والي لابس غترة بيضا ، والي ما يلبس شماغ موليه نظام دشاديش وبس .. والله ياختي انها تسال الدكاترة هذا ايش الفرق عن هذا ؟!!.. انا لا شفتها يحليلها تسلم ، بس عسى ما اشوفها بيني وبين نفسي اقول "يا دااااافع البلا">>ياختي يا كثر ما تتشكى .. الله المستعان .

[بو عبد المحسن الصايغ]

اقتباس: المشاركة الأصلية كتبت بواسطة بنت اهلها    اللهم آمين مشكلة الاجانب يالغاليه ان ماعندهم ثقافه عن دول الخليج والا هذي جايه بتشتغل وبتعيش كم سنه بالكويت ما كلفت عمرها تقرا لها كتاب عن البلد اللي رايحه له او تفتح النت وتاخذ معلومات ... معتمده على ورقه فيها رسم لشخص جاهل ... الله يكون بالعون الله يعطيك العافيه يافحيحيليه

السلام عليكم ورحمة الله وبركاته
خطأ كبير دائما ما نقع به لأننا نظنهم لا يبحثون ولا يقرؤون عن البلاد التي(( سوف يعملون بها )) وليس للسياحه فهم سيعيشون على تلك الارض فترة زمنيه ليست ببسيطه فالنقل سنه على الاقل سوف يرون نمط عيشنا وقد يدخلون فيما بيننا بزيارتهم لمجالس الرجال ( الدوواوين ) فهم جيدوا الأنصات للمعرفه .
ولكنهم سيعيشون على النمط الذي نعيشه وحسب من يجالسون سواء كانوا جلساء خير أو شر فهم كالعجينه تشكلينهم حسبما تريدون .
وأرجو أنني وضحت رأيي ومما رأيت منهم ( الأجانب )

[فحيحيلية أصيلة]

اقتباس: المشاركة الأصلية كتبت بواسطة بو عبد المحسن الصايغ    السلام عليكم ورحمة الله وبركاته خطأ كبير دائما ما نقع به لأننا نظنهم لا يبحثون ولا يقرؤون عن البلاد التي(( سوف يعملون بها )) وليس للسياحه فهم سيعيشون على تلك الارض فترة زمنيه ليست ببسيطه فالنقل سنه على الاقل سوف يرون نمط عيشنا وقد يدخلون فيما بيننا بزيارتهم لمجالس الرجال ( الدوواوين ) فهم جيدوا الأنصات للمعرفه . ولكنهم سيعيشون على النمط الذي نعيشه وحسب من يجالسون سواء كانوا جلساء خير أو شر فهم كالعجينه تشكلينهم حسبما تريدون . وأرجو أنني وضحت رأيي ومما رأيت منهم ( الأجانب )

وعليكم السلام ورحمة الله وبركاته.. اخوي بوعبدالمحسن داايما تشرفني بردودك وزيارتك لاي موضوع اضيفه وهذا يشرفني يا اخوي.. طيب يا اخي انت محظوظ اللي التقيت باجانب وخالطت اجانب ايجابيين بهالطريقة اذا منصتين و يزورون الدواوين ،، لكن انا الي التقيت فيها ما كانت من هالنوعية اهي جاية وعندها معلومات اما متواضعة او حتى ما تليق فيها ك استاذة - منو الحين يفرق بين الناس باشكالهم وايش يلبسون؟!!.. انت من وجهة نظرك هذا تفكير ناضج؟!

[بو عبد المحسن الصايغ]

أختي الفاضله هل تريدين ان تعرفي كيف يقيم الأجانب الدول الأخرى , عندما يزور سائح دولة أخرى وطريقة تعامل السائح مع أهل البلد هي التي يبني عليها المستوى المعيشي والأخلاقي لتلك البلد .
وهناك مثال آخر أرجو أن تدخلي الى ال ( youtube ) , وتلقي نظره على مقابلة أوبرا وينفري مع أحدى السيدات الكويتيات وستعلمين ما أقصد .

أما فيما يخص الشهاده والمستوى التعليمي فأجدادنا رغم أميتهم فهم أفضل منا في أدارة أمورهم وبالأخص ادارة الأسره .

[فحيحيلية أصيلة]

اقتباس: المشاركة الأصلية كتبت بواسطة بو عبد المحسن الصايغ    أما فيما يخص الشهاده والمستوى التعليمي فأجدادنا رغم أميتهم فهم أفضل منا في أدارة أمورهم وبالأخص ادارة الأسره .

كلمة حق قلتها يا اخوي بوعبدالمحسن.. وتستااااااااااااااهل الاشادة معاك حق 1000%