لاوهني الي رصيده ملايين ؟ شاعر السور (سليمان الهويدي)

[مشاري العنزي]

قصيده لشاعر السور

سليمان صالح الهويدي
رحمه الله

لا واهني الي رصيده ملايين
وامضاه في راس القلم يقبلونه
وبواخره تمشي بكل البلادين
ومصادره من كل شكلٍ نمونه
وعنده عيالٍ صالحين ورشيدين
لا غاب والدهم هم يمثلونه
بيته يعانق شاهقات الضلاعين
تلقى الحمام مبيضٍ في ركونه
وديوانه اكبر مابنى بالدواوين
مفتوحٍ واجواد العرب يدلونه
فيه الخدم متكاملين ومطيعين
من جاء لهالديوان بيباشرونه
ولا صارت الريضان مثل البساتين
ماطاب من ريضانها ينزلونه
تلقى الخزاما والنفل والرياحين
تطرب له الورقه وتزعج فنونه
مع لابةٍ تنطح وجيه الشياطين
عزٍ لهم وهم يتفادون دونه
هذي الحياة الي لها الناس شفقين
من غر منها يا حياة المهونه
اشوى من الي ياخذ الدين بالدين
وطّلابته راس الشهر يبلشونه
ومع الفقر عنده بزور ونساوين
يبون حاجتهم ولا يعذرونه
يقضي معاشه مامضى الشهر يومين
الفقر شيبّه وشيب عيونه
عايش ولكن عيشة الفقر مسكين
كنّه مصخن وهو مابه صخونه
يا الله ياقابل صلاة المصلين
انك تقوم بعوننا ثم عونه

[تميم نجد]

رحمه الله عليه وعلى كل مسلم

وتسلم على النقل يا الحبيب

[الناصر]

لا واهني الي رصيده ملايين وامضاه في راس القلم يقبلونه
وبواخره تمشي بكل البلادين ومصادره من كل شكلٍ نمونه

قصيدة جميلة للشاعر الكبير سليمان الهويدي يرحمه الله
شكرا للاخ الفاضل مشاري على الموضوع الجميل