ياكويت بالمرة عَلـَيْ لا تَعَتْبين
لاني بمنْك ولانتي يكويت مني
ماني ولدك اللي بَالاول تَخَبرين
ولانتي بأمٍّ لي عليَّه تحني
من يوم فضلتي علينا البعيدين
صرتي عذاري بان منك التجني
عيالك طردتينا وحنا المودين
وخذتي عيال ٍ غيرنا بالتبني
ناسَ ارغدوا واثروا وهم مستريحين
واللي اشتقوا ما حصلوا الا الهبني
يوم السفر والغوص وابيوتك الطين
روحي اسألي الهيرات يكويت مني
تعطيك عنا العلم واتخبّرِك زين
وتذْكر لك ايام ٍ لنا قد مضني
بين السفر والغوص راحت لنا اسنين
يشتان منها القلب وايهبلني
نقطع غبيب ٍ تبتهر كالبراكين
عقل الذليل ايكود منها يجني
ونصارع امواج البحر مستميتين
ابدا ً فلا نرتاح او نريهني
كله لعينك بس نبغيك ترضين
ندعي العمار الغالية يرخصني
ويوم ان صفا جَنْدك وزرعك غدا زين
والخضر هلَّن والعَقَاب ادبرَنِّي
حنا غدينا من جناك امحرومين
واللاش بارضك داله ٍ وامتهني
ما ينفعك ياكويت بالعسر واللين
إلا عيالك واخذي العلم مني
هم عزوتك وهْما غناتك عن الدين
وهْم الذرا لين الليال اظلمني
والا الغريب لوجاد وياك هالحين
عليك ما يبرح يدُور التجني
يبدي البشاشة ويظهر العطف واللين
ومن تحت ثوبه خنجر ٍ لك يسني
بس ينطرك يبغيك يوم ان تطيحين
حتى يَغَرسه واخذي العلم مني
ـــــــــــــــــــــــــــــــــــــــــــــــــ
الله يرحم الشاعر الفلته صالح النصر الله
الله يرحمه مات من الحرة والقهر على قتل ابنته المرحومة باذن الله
المراد
القصيدة بصوت الشاعر
[ame]http://www.youtube.com/watch?v=5bu4RRHkqME[/ame]
العرض المتطور
