شاعرة من بادية الكويت
يابووي جعلك للبقا والمكااسيب
عمري بدوونكـ يالذرا وش ابي به .!!
يابوي تسأل عـن شفـاك المراقيـب
طلعـة سواتـك للنّوايـف غريـبـه
ليه المرض مايعرف الزّين والعيـب ؟
مايـدري انـك للمخاليـق هيبـه !!
ابســـــألك وش بك غزا وجهك " الشـــيب "
والقــلب لا يـــــع والنـــــــــواظر شحيبــه
وش بك تحاتي لا نوى الموت تغريب ..
تخشى علينا الليالي [الكئيبـــه]
خذ دلتـك .. واركي علي مسند الجيــب ،،
وعطني [شماغك] بلثمه واحتمى به
ونروح لارض بها العشب والطيب !
وتسمع كلام [يالغلا] تحتفى فيه
يابــوى بنتك لا نحكي بالتــجاريب
كل يشهق لهيبه الصيت جيبه ..!!
يابوي ماني من سـوات المخاريـب
اللّـي تجيـب لعليَـة القـوم خيبـه
وماني من اللّي لامشت حفّها الرّيـب
أنـا مـن اللّـي مايدنّـس حليـبـه
مرفوع شاني عـن غـرام المكاتيـب
وأكبر من انّنـي أرتضـي بالحبيبـه
أنـا غرامـي لاابتـدوا بالتّراحـيـب
نفوس الأوادم فـي وجـودي رحيبـه
وان كان [زينـــي] فتنة للمصاويب
احط وجهــي بالحريق ولهيبه
زينــي ابيعـه واشـترى سمـعة الطــيب
اســم ينومس بالصـروح الذهـــــيبه
وان كان عندي ( بالحلا) شي ٍ اصعيب
عنـدي جـدود ٍ مارضـت بالغليبـه
دموع القبايـل فـي لقانـا مساكيـب
كـن المقابـر لاحضـرنـا قريـبـه
خضّبت لك كفّي من العـز تخضيـب
ورفعـت راسـي للنّجـوم الصّعيبـه
والله لأسـدّك بالفعـول المصالـيـب
والله لأشيلـك بالرخـا والمصيـبـه
طلع المعالـي ماانحكـم للشّواريـب
بنت ٍ وأناطح فـارس القـوم طيبـه
ويااشيــخي ابشـر لو تدور الدواليب
بنــــــتك لمن عوى الذيب [ذيبه] ..!!
منقول من كتاب " نساء العرب " واسم الشاعره مجهول وتنسب الى شاعره كويتيه كانت بصحراء الكويت وعندما مر بعض الرواة سمعوها تنشد الشعر وكان في أواخر ال 60
التعديل الأخير تم بواسطة الاميرة ; 11-12-2008 الساعة 12:27 AM.
|
العرض العادي
